إذا استيقظت من النوم ولم تستطع مشاهدة أي شي فأعلم انك أعمى
حوت متبودر
--------------------------------
وانا صغير كانت متعتي اذا جا في الليل ادخل مقلط الحريم واصك الباب واجمع المساند حولي واحط جلال امي فوقي كنها خيمه واجيب صحن ( فش فاش)واقعد اكله (مررررررررريض) .
جدي الله يرحمه كان حكيم ودائما ينصحني أقدم على الوظائف حتى وأنا ادرس يقول :قدم من الحين متى يطلع رقمك ( متعود على الأراضي)...سمعت كلامه ورحت أقدم قالوا: ملف وأرفق شهادتك ( ينعن أم الإحراج) توني في سادس جلست في المجلس اهوجس وفيه جارنا شايب جالس ينتظر جدي وقاعد اقهويه ...صبيت الفنجال الأول والثاني ووصلت للفنجال التاسع يشرب شرب كنه جالس في بار وميتين عياله في حادث...وصار يمسك الفنجال وينفضه من بعيد يخلي القهوة تطير في الهواء على شكل كوره ويبلعها ...كنه في سفينة فضائية مافيه جاذبية....وصار يتنفس بقوة ويحط الفنجال ويخبط بيده على الطاولة ...رحت اركض لجدي كان في الحمام ( الله يكرمكم ) قلت الرجال ينتظرك ...قال منهو ؟؟ ...قلت ماقالي اسمه بس أشوفه يصلي في مسجدنا...طيب وش شكله؟؟!!!.....قلت: أفمه وسيع وأسنانه قليله وكبيرة كنه حصان يضحك.......قال ينعن شكلك ليش تدخله يالبزر.....كم فنجال شرب؟؟ قلت 13 قال خلاص أي فنجال زيادة اخلطه بمويه...طبعا دريت إن السالفة دين ما سدده جدي....رحت للشايب قلت جدي يقول: إنا في الحمام وبطول وش تبي ؟؟
قال: قله ها للي تنزله في الحمام من خيري ...وابعطيك أسبوع تسدد الدين...وقبل ما يطلع قال جب لي كاس بلاستك....صب فيه قهوة ولفه بجريدة وطلع .
قلت إنا مالي وهالمشكلة خلني أفكر في وظيفتي جبت ملف وصورت دفتر القواعد والمدرس كاتب ( ممتاز ) وقدمت الملف راحت السنين...جت حرب الخليج وانتهت وجت القمة العربية وانتهت وفتح جنبنا محل بيتزا وصك...كل هالاحداث وانا انتظر و في أخر ترم بالجامعة اتصلوا وقالوا : ياليت تمرنا بوكره الصباح الدور السادس عندك مقابلة شخصية ...وافرح فرحه مثل فرحة الصيصان إذا ولعت لمبة العشه.
واطمر على الكرسي والدكتور يناظر واقعد ارقص رقصه ذيك اللي احط يدي على(طووووط) .....واهز كني اوخر عن طلقات رصاص واطلع اركض لمواقف السيارات من السرعة قعدت اركض على يدي ورجلي واذا مريت من عند احد انبح ...وأنا في الطريق شفت حادث قلت : عسى المسكين بس موظف عشان يصلح سيارته...في الليل قعدت اسولف على كل أخواتي وأخواني وعشيتهم على حسابي بمناسبة الوظيفة وقعدت اتفلسف أقول المفروض الواحد يقتطع من راتبه للمستقبل ودراسة عياله.....ومن هالكلام التافه...بعد ما راحو قعدت اتلحوس عند أمي وأنا متسفط واطقطقها براسي كني قطو توه مولود أعمى ويدور ديد أمه.
ويجي الليل واتلحف وأنا مبتسم كني واحد راح منه الإمساك....ركبت المصعد واضغط رقم 6 ومثلك قعدت إناظر مراية المصعد وانظف الغمص وشد خشتي وارفع وجهي عشان أشوف شعر الخشم هو واضح ولا لا...فجأة طفئ المصعد وقامت تأشر لمباته كنها لاندكروزر بيسقط وأحاول افتح الباب بيدي قلت بس هذي النهاية وتجي في بالي صور سريعة وانا صغير اللعب بالمرجيحة وأبوي يلاعبني........ مثل لقطة فلم ( ارماغدون ) يوم فجرو النيزك .
وأشوف ذبانه واذبحها لا تستهلك هواء , جلست في الزاوية قلت شلون يعني أموت كذا؟؟!! _ اللهم لا اعتراض _ طيب على الأقل خلو المصعد يطيح للدور الأول وأتكسر وأموت , والله فشيله عند اللي بيغسل جثتي على الأقل يشوف الكسور والدم يقول أكيد حادث تريلا ولا مضاربة وهو يدافع عن أهله ضد الحوثيين , موب يغسل جثتي وأنا ميت من الجوع قسم بالله موهب عارف يغسل من الضحك تخيلت شكلي منسح وفاتح أفمي كنك لاقط صورة لديك يأذن , ولا عيوني داخلة وجافه كنها عبسة جحه , ولساني يابس ومنعفط كنه حبة كاجو , وبطني بيصير صغير إذا قلبوني وخلوني ساجد تحسبني سلقه.
قعدت افكر وشمشم وسمعت صوت هواء عند الباب وأحاول افتحه بيدي وأنا اصرخ وينفتح الباب واطلع وألقى نفسي في السطح وينصك باب المصعد ( صار مصعد الخدمة ) وشمس حارة حطيت يدي على حاجبي وأنا أناظرها وقدامي شجرة شوك يدحرجها الهواء جلست متسند على الجدار قلت ياليتني رضيت بالموت جوعا ولا كذا أموت من النسور تخيلت شكل النسر الوصخ الأصلع وأنا طايح من التعب وهو جنب خشتي يناظر بعينه.
إنا ما همني الموت بس الاعتراض على الطريقة تعرفون وش معنى ياكلك نسر كأنك تقطع لحم أبطك بمقص أظافر عرفتوا الألم قسم بالله إن تصيح حتى لو عمرك 47 سنة إن تترجى النسر كنك بزر .
غابت الشمس انسدحت وأنا خايف قعدت أصيح بس مايطلع صوت كنه صياح بزر شايت الكورة في بطنه ...جتني فكرة إني انزل من العمارة قعدت أفكر وين أجيب الحبال منه لقيت كم سلك وفصخت ملابسي والشماغ >>> لا احد يضحك كنت لابس الشماغ للمقابله
واربطها وانزل ما علي إلا الهاف وقبل ما أوصل للأرض زلقت ونشب الهاف وانمزع على طول جا في بالي فوقي كوره كرستال وتاشر على جسمي لمبات ألوان....... واتوزا ورا زباله ....
شلون أوصل البيت؟؟!!
رحت امشي ورا السيارات وإذا شفت احد انسدحت تحتها وإذا فضى الشارع رحت اركض وصوت لحم رجلي على الزفلت كنه صوت المجلة إذا فتحت صفحاتها بسرعة.
وصلت البيت وراحت علي المقابلة بسبب مصعد ابن كلب المشكلة مفاتيح البيت ضاعت واشوف الحارة مافيها احد وادخل بسرعة وبيتنا وسط الحارة ولا فيه ولا سيارة كل السيارات داخل الييوت يعني لازم اوزن ركضتي بحيث لودخلت سيارة الحارة ما اتورط , واسمي بسم الله واركض وانا مدنق كني دجاجة تركض بدودة واتمسك في الباب وأحاول اطمر وشوي واسمع صوت ( احم احح وخ توف ) صوت جارنا الشايب الحيوان اكرهه كره من اقذر الشياب في العالم وشيييييييين اشين من القذافي لو يحلق صلعه..... بيكب الزبالة هذي شغلته في الدنيا ودائما اشوف القطاوة تحب زبايله شكله يستعجل على عياله في العشاء عشان يطلع يكب السماط , وإذا كلوا جح وبطيخ يكب الزباله وهو مبسوط يضحك لانها ثقيله تفكير تافه , وعليه تفله ( تكرمون) كثيرة وثقيلة أول ماشفتها كنت راجع من المسجد الفجر واشوف شي مخاطي كبير جنب الزباله واتصل على الشرطة قلت فيه لقيط في الشارع يوم وصلوا قالوا: وين الطفل ..قلت : إنا ماشفته بس أكيد انه كان موجود شوفوا المشيمة طايحة على الأرض.
حاولت أرقى الجدار بسرعة قبل ما يطلع , ثم سمعت صوت بابه قلت خلاص شافني بس ابوقف بدون حركة كوده مايشوفني . ويوصل الزبالة وينطل الكيس ويطلع صوت خبطة الكيس وهو يقول يازين هالصوت ثم سمعته يقول : عمى وشذا.. واوقف بدون حركة و يمشي بشويش ثم احس بنفسه المشكلة وقف في اصعب حركة كنت متمسك بيدي على الجدار ورجلي رافعها على الجدار كل وحده في جهه كني علامة ( جيب طوارق ) , واحس بنفسه وهو يقول وشذا؟
واللي ما يعرف علامة الطوارق كنت مثل كذا:
ويمد يده ويضغطني باصبعه ثم يضغط ثانية قلت: خلاص هزلت انتظر الضغطه الثالثة عشان انزل عليه بكعب الرجل في جبهته والله لاذبحه قبل مايتشهد ,واقطعه مايلقطونة ولا بعلك.... ثم راح وهو يقول: الله يستر علينا الله يستر علينا لا حول ولا قوة الا بالله. دريت انه عرف هاللي يضغطها أي جزء في الجسم.
